Ua na’o ni galu na osofia ai se vaega o le atunuu i Savaii e pei o le afioaga o Satupaitea e mafua i le galulolo poo le Tsunami na aafia ai le motu tuaoi o Tonga i le faaiuga o le vaiaso ona o le sasao malosi o le maugamu i se tasi o motu o lea atunuu.

E oo mai i le afiafi o le Aso Sa na tuana’i atu nei o loo aumai pea fautuaga o Tsunami mo Samoa mai le Ofisa o le Vaai Tau ma le fautuaga ia mataitū gaioiga e vaaia le gataifale i nofoaga maualalalo. 

O le taeao o le Aso Sa na faaleaogaina ai lapataiga ae tumau pea fautuaga mo se Tsunami e ui o le taimi nei ua le’o toe sasao le maugamū mai le aliti tai o le sami mai le motu o Ha’apai. 

E tusa ai o ripoti lata mai e le’o iai ni fale na faaleagaina i ni vaega o Samoa na vaaia ai le osofia e le galu ae ua na’o na lofia e le sami. Na faatali e atu lapataiga i vaega o le atunuu Sa ono aafia ina ia agai i nofoaga maualuluga Sa molimauina i ata feavea’i i luga o le Facebook lea tulaga. 

Sa faatino foi tiute o le Ofisa Tutotonu mo faalavelave faafuasei matuiā e mataitū lapataiga na tuuina atu e le Ofisa o le Tau mo le puipuiga lava o le saogalemu o le soifua o tagata o le atunuu.