Faailoa nisi o galuega e agavaa ai le au seila Samoa

O se laasaga mataina mo alo ma fanau a le atunuu  o loo galulue i luga o vaa poo seila i luga o vaa la’u oloa ma meli la’u pasese ni avanoa e mafai ai mo le taimi muamua ona avea i latou o ni ofisa i luga o vaa tetele.

Ua faailoa i se pepa o faamatalaga mai le Ofisa o le Minisita o Felauaiga Tetele a le Mālō le tatala atu o ia tulaga Tofi i fanau a Samoa e mafai ona talosaga iai. Peitai e itiiti se avanoa  saofāgā ai ia tulaga I ni Ofisa ona e le’o mafai ona oo le maualuga o le aoaoina i galuega faaseila i le aoga mo Alii ma tamaitai seila i le Iunivesite Aoao o le atunuu. O le faamatalaga lea mai le Ofisa o le Minisita.

Ua silasila ai nei le Mālō e saili ni avanoa sikolasipi i Niu Sila o Ausetalia ma Fiti e mafai ai ona maua aoaoga faaofisa i luga o vaa mo alo ma fanau a le atunuu e agavaa ai ona talosaga i latou i ia avanoa ma umia ai foi ia tulaga maualuluga i galuega i luga o vaa tetele.

O le masina o Setema o le tausaga ua mavae na taofia ai le toe auina atu i fafo i Seila mai Samoa mo ia galuega ona o le saoasaoa o le malosi o le pipisi o le faama’i Koviti19. Peitai o Aperila o le tausaga nei na toe tuua ai Samoa e i latou ua maua galuega i luga o vaa. I faamaumauga i le taimi nei e 298 le aofaiga o seila mai Samoa ua toe galulue i luga o vaa o le sami. E to’a 265 o loo galulue i luga o meli la’u pasese ae 33 luga o vaa la’u oloa.

O le masina nei ma le masina faai’u o le tausaga ua faamoemoe e Malaga atu ai nisi o seila mai Samoa ma o loo silasila le Pulega o le Kamupani vaa a le atunuu e ausia le 400- 500 seila mai le atunuu e Malaga atu i fafo mo nei galuega i le faaiuga o le tausaga. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required