O faiga masani a le malo e fesoasoani i le itu tau seleni, pe a tapena se ‘au filifilia a le atunuu e masii atu mo ni taaloga faitaulia.

Ma o tapenaga mo le Olimipeka i lenei tausaga na faalauiloa faalauaitele ai e le Asosi o Taaloga le manaomia o se tinoitupe e $1.2 miliona tala e faatupe ai tapenaga uma e aofia ai totogi o pasese ma nofoaga o le a faamautu ai.

Ma e faalagolago foi la le Asosi i le malo ma ana paaga masani e fesoasoani atu i le itu tau seleni.

I le faatalanoaga a le Minisita o Taaloga ma Alagaoa mo le Fiafia o Tagata ma le TV1 na manino ai e lē taumate lava le tuu atu o le tau’au o le malo mo alo ma fanau.

Pau le tulaga na faailoa manino e le Minisita o Laumatiamanu Ringo Purcell, e faalagolago le aofai o le fesoasoani a le malo i le numera o le autaaalo ma le pulega o le a malaga.

Ma o i o loo faatalitali ai le malo ona mafai lea ona tali mai i le manaoga.

Saunoa Laumatiamanu i le TV1 e lei mautu atu se fainumera, ma o loo iai foi le Komiti Faafoe e latou te fesoasoani i lea tulaga.

O le taimi nei e toa 21 le autaaalo a Samoa ua agavaa e tauva i taaloga o le Olimipeka. 

E 10 taaloga ua faamaonia mo le taimi nei seia vagana ai le taaloga o le Judo ma le aau o loo tālia.

Mai i taaloga e 10, e toa 12 mai le aulakapi taitoafitu, 1 vaa afaila toalua mai au siisii toalua mai le aupii, toatasi le afeleti, alovaa nofoa tasi e toalua, ma le fusu e toatasi.

O loo tau faamautu le aulakapi taitoafitu, ae o Eroni Leilua mo le tuuga vaafaila, Don Opeloge ma Iuniarra Sipaia mo le ausiisii u’amea mamafa, Gaku Akasawa ma Wilie Alofipo mo le aupii, Alex Rose mo afeleti, Tuvaa ma Samalaulu Clifton mo le alovaa nofoa tasi, ma Ato Faoagali i le aufusu.

Ae o le masina na se’i mavae atu nei na faamatuu atu ai e le malo o Ausetalia e tauala atu i le Pacific Aus Sport le fesoasoani mo le asosi mo a latou foi tapenaga.