Fofoga Fetalai Papalii Li’o Taeu Masepau & Tiatia Graeme Tualaulelei
Fofoga Fetalai Papalii Li’o Taeu Masepau & Tiatia Graeme Tualaulelei

Faailoa mafuaaga ua faamālōlō ai le Failautusi o le Ofisa o le Fono

Ua faailoa lautele se finagalo o le Fofoga Fetalai le susuga Papalii Li’o Taeu Masepau i mafuaaga o lana faaiuga na faia i le Aso Faraile 17 o Setema e pei ona ia faamālōlō ma faamuta ai le taimi galue o le susuga ia Tiatia Graeme Tualaulelei.

O se tamaalii na umia le tofiga o le failautusi o le ofisa o le fono aoao faitulafono o le faauluuluga foi lea o le isi vae o le tafatolu o le Pulega o fefaatauaiga o le Mālō.

O le faaiuga a le Fofoga Fetalai na oo iai le finagalo o le sui faipule o le ituagai le tōfā Lealailepule Rimoni Aiafi e le gata o lana faauilāvea ae faapea lana saunoaga i le tala autu o le tupe. Na faia ai ma le faaiuga a le Fofoga o le fono ae le’i amatalia galuega o le Palemene i le Aso Lua e lē tatau ona toe oo iai se finagalo o se sui usufono o le fono usu a Samoa.

O le pepa o fasalalauga faalauaitele mai le Ofisa o le Fofoga Fetalai ma faailoa ai e le susuga Papalii o tali a lē sa avea ma failautusi o le fono na tuuina atu ua ia lē mafai ai ona faailoa poo ai e ana le faatonuga na taofia ai le faatinoina o le finagalo o le faamasinoga e faataunuu le tauaofiaaga muamua o le paeaiga fou lona 17 o le Palemene i le Aso 24 o Me.

O se vaega lenei o le finagalo o le Fofoga Fetalai ua aumai faalauaitele 

“Na o’u fesiligia faapitoa le failautusi mo sona finagalo i le mafuaaga e pei ona o’u taua e aofia ai lona lē tausisia poo le lē usitaia o poloaiga a le faamasinoga ma tuuina atu i le Aso Sa 23 o Me lea na mafua ai ona tuuina atu le faaaliga e aloaia faaletulafono ai le malelega mai le afioga i le Ao o le Mālō i le Aso 20 o Me ina ia faapena ona tauaofia le Palemene i le Aso Gafua 24 o Me.

O lona lē tausisia poo le lē usitaia ai o poloaiga a le faamasinoga ua faaalia manino ai e faapea o le Malelega a le Ao o le ‘Mālō na tuuina atu i le Aso Toonai 22 o Me e faaleaogaina ai le poloaiga na a tuuina mai i le Aso 20 o Me e solitulafono.

O lona auai i le faaooina atu ma lona faatuatuaina o se poloaiga na tuuina atu e lē sa avea ma Fofoga Fetalai i le afiafi o le Aso 23 o Me e tolopoina ai le tauaofiaaga o le Palemene i le aso e sosoo ai e ui lava ina ua maea ona tauaao atu iai le poloaiga a le faamasinoga i le aoauli o le Aso Sa 23 o Me.

O le faia o ni gaioiga faafoliga o loo usitaia poloaiga e ala i le faatinoga o tapenaga masani mo le usuia ai o le fono a le Palemene i le aso e sosoo ai i le afiafi o le Aso Sa ma faapena foi le taeao o le Aso Gafua na sosoo ai ae peitai e le’o lona faamoemoe lea ona ua maea ona ia taofia lana aufaigaluega mai le faia o tapenaga ma faapea ai loa ona loka le maota fono ma na ia taofia ki i le taimi na faatonuina ai o ia e tatalaina le maota.

Na ia fautuaina i latou uma na aofaga potopoto i luma maota o le Palemene i le taeao o le Aso 24 o Me e na te lē lagolagoina soo se itu i le tatalaina aloaia o le Palemene ma o loo ia mulimulitai i faatonuga a ona taitai. Ua tuuaia i lona faia o ni uiga faasolitulafono e pei ona maua le mataupu a le Loia Sili ma Latū le faaiuga lea o le faamasinoga o talosaga toe iloilo o le Aso 23 o Iulai i lona mulimulitaia lea o faatonuga a lē sa avea ma Fofoga Fetalai o ia lea ua le’o toe iai se malosiaga i lana pule faataga i lea taimi poo ua ia le mafai ona faatino lana ia lava faamasinoga tonu ina ia lokaina le maota fono, ua ia teena e lagolago i le avea ai ma failautusi i le tapenaga o le uluai fonotaga a le Palemene o le Aso 24 o Me, ua ia tuumuli ese ma lona mautinoa mai lona ofisa ina ia taofia ai sui o le vaega faaupufai a le Faatuatua i le Atua Samoa ua Tasi mai le sailia o lana fesoasoani.”

O le tusi lava lenei ua taua ai e le Fofoga Fetalai “O le faia o ni gaioiga faafoliga o loo ia lagolago e ala i tapenaga masani mo le saunoaga e tatala aloaia ai le Palemene i le po ae malama le taeao o le faatautoga e oo lava foi i le taeao ae peitai o loo iai se lagona faatautee ma o se tulaga lē manuia tele lea na molimauina i le Aso 23 ma le 24 o Me ma ua faaalia manino ai le itu o mafuli iai lona faamaoni ma lona tulaga faatuatuaina.

O itu nei ma mea na tulai mai ua iai se manatu o le Fofoga Fetalai ma se silasila a le Mālō ua ia lē ausia ma faamalieina ai tulaga maualuluga o le faatuatuaina o le tofiga o le failautusi o le fono aoao faitulafono.”

O lea ua faailoa e le Fofoga Fetalai ua ia tofia Leatisā Uitime Tala e tauaveina tiute faafailautusi mo le taimi nei seia maea ona faasalalauina le avanoa o le failautusi ma faatino le faagasologa masani mo le faafaigaluegaina o se na te tauaveina le tofiga o le failautusi o le fono aoao faitulafono.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required