Ua faailoa lautele nei polokalame o le lima masina o totoe o lenei tausaga ua faatulaga ai ma nisi o polokalame o le faamanatuina o le 60 tausaga o le Tuto’atasi, e pei o le vaiaso nei ua faamanatu ai le tāua o Tupulaga Talavou o Samoa ma le lalolagi.

O lea foi ua faailoa o le masina fou o Setema mai le Aso Gafua aso 5 e oo i le Aso Toonai le aso 10 o Setema ua atofa e faagasolo ai polokalame o faafiafiaga o le onosefulu tausaga ma o le vaiaso foi e masani ai o le Teuila. Peitai o le a leai ni polokalame faatauvaga o le Teuila ae o le a avea o se vaiaso o faafiafiaga ma isi polokalame e taualuga i le tauvaga e saili ai se Tausala o Samoa.

O loo mautinoa foi o masina o Oketopa ma Novema o le taimi masani o le tāina o le palolo aemaise o Oketopa o le vaiaso lona muamua ma le lua o tapenaga mo le lotu a tamaiti poo le Aso Sa pa’epa’e o le fanau.

O le masina faai’u o le tausaga o aso fiafia o le Kirisimasi ma o le tausaga muamua lenei o le a toe tumutumu ai Samoa i aiga mai fafo o le a malaga mai mo aso fiafia masani o le faai’uga o le tausaga, i le tuanai o tausaga e lua o tapunia malaga masani ona o le faama’i Koviti-19.