Ua faailoa nei e le Malo o Ausetalia e tauala mai i le Minisita o Suiga o le Tau, Chria Bowen e tusa ma le fesoasoani tele lea o le a tuuina i atunuu o le Pasefika e fesoasoani i taumafaiga a Malo o le Pasefika i suiga o le tau ua aafia ai nei.
I pepa o faamatalaga mai i le fonotaga a Malo Aufaatasi o loo faagasolo i Dubai sa feiloai ai Bowen ma le Minisita o le Siosiomaga, Afioga Toeolesulusulu Cedric Schuster e faalauiloaina ai lenei fesoasoani.
“O le a fesoasoani Ausetalia i se seleni e $100 miliona mo le Pacific Resilience Fund ma le $50 miliona mo le Green Climate Fund.
“O nei fesoasoani tupe e sili ona tāua, o le Pacific Resilience Fund e tāua tele ia Ausetalia ona o nei seleni e mo le Pasefika, ua mae’a faataatitia e Taitai o Malo o le Pasefika e fesoasoani i vaega e ao ona faaaogāina ai.
“O le Green Climate Fund e mo le silafia o le faigamalo ua mavae atu a Ausetalia sa faasee mai ma lenei fesoasoani.
“Ae ua mae’a faia le faaiuga a le Malo ua iai nei o le a toe foi lava i totonu o lenei vaega, e malamalama foi le feau e moomia lava le vaai atu o loo taumafai le Pasefika o loo sologa lelei mea uma e tusa ma lo latou mafai o loo faatino ai nei vaega uma.”
Na fesiligia e tusitala le finagalo o le Minisita ia Toeolesulusulu e ala lea i le fesoasoani tele ua maau iai le Malo o Ausetalia.
“O mea uma lava o loo iloa e ao ina faaaogā ai lenei fesoasoani e pei ona iai afā e tolu sa aafia ai Vanuatu i le 9 masina.
“Ua mae’a tapena nisi o fuafuaga i atinae ma e tele ma anoanoai nei fuafuaga o loo faataatitia e Malo o le Pasefika.
“Ae o le lave tele lava o le avanoa lea e mafai ai ona maua fesoasoani e faatino ai taumafaiga o loo naunau iai.
“Mo Samoa lava ia ua mae’a ona atiae nisi o galuega i le talafatai ma silafia ai le ogaoga e ono pagatia ai Samoa mai nei vaega uma o loo feagai ai nuu ma afioaga.”
