Ua aloa’ia nei le avanoa o le nofoa o le tofi faipule o le itumalo faalepalota o Safata 1 i le Palemene, i le faasilasilaga mai le afioga i le Fofoga Fetalai, le tōfā Auapa’au Mulipola Aloitafua Mulipola.
E pei ona silafia i le faaiuga na fofogaina talu ai nei e le faamasinoga o faigapalota le faamaonia o moliaga o faiga fa’aālātua faasaga i le afioga, ia Seve Te’i Fuimaono sa manumalo i le faiga filifiliga a Safata 1 i le palota tele ia Aukuso.
O lea foi faaiuga na faamaonia ai moliaga o faiga fa’aālātua faasaga i le afioga, ia Leā’anā Ronnie Posini sa faauluina le tagi ma o se tamāli’i sa sē’ei foi i le nofoa o le tofi faipule o Safata 1 i le Palemene.
O le Aso Gafua o lenei vaiaso ua amata su’esu’eina ai le mataupu mulimuli o tagi o le palota mai le itumalo o Falealili 1 lea o loo molia ai e le sui sa tauvā mo le pati faaupufai e puipuia aiā tatau o tagata, le tōfā Tuiloma Tusa Lainiselota Lameko; le sui faipule na toe filifilia le afioga i le Sui Palemia, afioga Toelupe Maoiautele Poumulinuku Onesemo.
