O loo faagasolo pea galuega o le toe siakiina atoa o afi ma le tino o se tasi o vaalele twinotter o le kamupani vaalele o le Samoa Airways lea o loo faia ia galuega i le atunuu o Kanata, ma ua faailoa ai e le kamupani vaalele o le autu o ia galuega o le faamuamua o le saogalemu o le ola ma le soifua o pasese.

Ua iai le fuafuaga poo le masina o Novema o le tausaga nei e toe foi mai ai le vaalele twinotter o loo faia ona siaki, ma o le a fetaui tonu ma le taimi pisi o malaga o le vaitau o le Kilisimasi.

O isi vaalele e lua o lea lava ituaiga o loo tautuaina malaga i le va o Samoa e lua ma le motu o Manu’a i Amerika Samoa, o le tasi o ia twinotter o le a ave mo siaki o le saogalemu poo le masina o Fepuari poo Mati o le tausaga fou e pei ona faailoa e le Samoa Airways.

O ni alii pailate mai le kamupani o le Planes and Parts Limited i le atunuu o Kanata sa totogi e le Samoa Airways mo le aveina o le vaalele twinotter o loo faia nei iai galuega mo le faaleleia ma toe siaki uma afi ma le tino.