E lua ni tusi tāua ua faamauina nei o se alafua lea i le aga’i atu e taofia le faafaigaluega o fanauiti, ae ave iai le lagolago atoatoa e tuuina atu i latou i le a’oga, ma ia maua lo latou ola lelei ma le soifua mālōlōina.
O le tusi o faiga faavae a le Matagaluega o Alamanuia Pisinisi ma Leipa ua aiaia ai auala e taofia ai le faafaigaluega o fanauiti, faapea ma se tusi ta’iala ua tusia i le gagana Peletania ma le gagana Samoa o le a mafai ona galulue faatasi ai i latou e ana galuega ma tagata faigaluega.
O se tasi lea o taumafaiga a le matagaluega sa galulue ai ma le faalapotopotoga o galuega faavaomalo le International Labour Organization le ILO, e faataoto ai ni faiga faavae ma fausia ni ta’iala, ma sa lotolotoi ai ma le auaunaga tuma’oti o loo mata’itūina galuega i le atunuu, le Samoa Tripartite Forum.
Na faaalia e lea matagaluega a le malo i se pepa o faamatalaga, o le iai o lea faiga faavae ma le tusi taiala o le a saga faamalosia ai foi le sootaga o tagata e pulea galuega ma le aufaigaluega i auaunaga tuma’oti le private sector faapea faalapotopotoga tuma’oti a le malo poo state owned enterprises ma tagata faigaluega o loo galulue ai.
O le tafiesea ma le taofia o le faaaogā o fanauiti i galuega o se faafitauli o loo molimauina i nisi o fanau a le atunuu e lē o avea i le a’oga ae o loo faatau savali oloa eseese i le taulaga i le ao ma le po.
