O le au fai saofaga uma i le faalapotopotoga o le faaputuga tupe o le lumanai manuia o tagata le NPF, faapea le lautele o le atunuu e lē o toe iai ni saofaga, e manuia i le polokalame o le inisiua o togafitiga faafoma’i a lea faalapotopotoga tuma’oti a le malo.
O le amata faalauiloa ai o lea fuafuaga e pei ona mae’a pasia le tulafono e faatino ai, sa faailoa ai e le ta’ita’ifono o le Komiti Faatonu o le NPF ma sui o le komiti o lea polokalame vaega eseese o loo tapena iai, ao lei tuuina atu se latou lipoti i le kapeneta mo se faai’uga. Faaalia e le susuga Papalii Panoa Tavita Moala o le ta’ita’ifono o le komiti faatonu o le NPF, o le tausaga e 2005 na pasia ai le tulafono e le palemene e faatino ai le inisiua o togafitiga faafoma’i ae peitai e lei faatinoina lava tusa ai nei ma le 20 tausaga.
O tagata fai saofaga uma a le NPF e faamalosia pe compulsory ona tuuina atu ni vaega o a latou saofaga tupe i le polokalame, ae mafai foi i sui fai saofaga ona tuu iai ma nisi o o latou aiga e pei o mātua ma fanau.
O le au penisione poo i latou ua 65 tausaga o le soifua ma luga atu, e mafai ona faia se feutana’iga ma le NPF i le vavae ese o se seleni o lana penisione e togitogi ai le 300 tala i le tausaga o lana sao i le polokalame, ae afai ae totogi mai e a latou fanau o loo fai saofaga e pau i le 200 tala i le tausaga.
O se avanoa e mafai ai e le au penisione ona vaai se foma’i tuto’atasi auā o le taimi nei e na o foma’i i le matagaluega o le soifua mālōlōina o loo mafai ona maua fua ai lea tulaga e aunoa ma se totogi.
I le faatalanoaga ma le ta’ita’ifono o le komiti faatonu o le faalapotopotoga o le faaputugatupe o le lumana’i manuia o tagata le NPF, susuga Papalii Panoa Tavita Moala na ia faailoa ai, afai ae talia e le Kapeneta le lipoti ia latou tapenaga, ma amata faatino le inisiua o togafitiga faafoma’i, o le a faamuta loa le polokalame o loo faia i le taimi nei lea o loo totogi ai e le malo le ave i fafo o gasegase e togafiti ai aemaise i togafitiga e lē o mafai ona faia i Samoa.
O le Aso Toonai le faai’uga o le vaiaso nei e faia ai le feiloa’iga a le komiti o loo tapenaina lea polokalame ma le mamalu o le atunuu i Savaii, ma o Salelologa e faia ai lea feiloa’iga i le maota o le Apitaopisaga.
