Ua faaalia popolega a se taitai o le komeuniti a le Pasefika i Niu Sila i le faatinoga o galuega ma le vaaiga o tagata Pasefika o loo faanofoesea ma ua faamaonia le aafia i le Koviti ona o se faafitauli a’o feagai ai ma aafiaga o le faamai.

O le afioga ia Tuala Tagaloa Tusani sa faamaonia lona aafia ai i auga o le Koviti faatasi ai ma lana paaga ma na faanofoesea ai loa i le Novotel ma le Ibis Ellerslie o nisi o nofoaga o loo faamautu ai i latou ua aafia.

O le taimi nei o loo faasolosolo manuia Tusani peitai na ia taua e le’i faigofie le auina atu o ia i le falemai. E ui na talosaga atu Tuala i fomai o loo lagona pea le vaivai o le tino peitai na toe agai lava i le nofoaga o loo faanofoesea ai ona o le faatonuga mai le falemai.

O le Aso Faraile o le vaiaso na tea nei na oo atu ai o ia i le Falemai tele i Middlemore ina ua maea aso e lua na taofia ai ma faapea atu ai fomai ua lava lona malosi e toe foi ai i le nofoaga o loo faanofoesea ai.

O le Aso Gafua o le vaiaso nei na matauina ai le faateteleina o le tigaina o Tuala faatasi ai ma lana paaga, ua faafaigata ona manava. Na talosaga Tuala i le aufaigaluega a le MIQ mo se fesoasoani ina ua faanatinati atu si ona paaga i le falemai ae tali le aufaigaluega o loo malosi lana paaga “she’s fine”. Na ia telefoni foi i le vaega o loo gafa ma le vaaiga o i latou i lea faletalimalo mo se fesoasoani, ae sau le tali a le aufaigaluega “O le a tuu atu se fualaau (Panadol)”

E silia ma le 4 itula talu ona faatali Tuala ma lana mo se taavale a le falemai e faanatinati atu ai i le falemai mo se fesoasoani.

O lenei faafitauli na fesiligia ai e le Breakfast Show a le TVNZ le Sui Palemia o Niu Sila e ala i lea mataupu. Taua e Grant Robertson “e le’o se tulaga lelei le faalogo atu o tutupu mai nei faafitauli i tagata Pasefika o loo moomia le fesoasoani i nofoaga faanofoesea mo le agai atu ma taofia i le falemai”.