O Fuimaono Dr Dylan Asafo o se alii polofesa I mataupu tau I le tulafono I le Iunivesite o Aukilani, ma e iai ana faailoga faatulafono mai se tasi o Iunivesite maualuga I le lalolagi I le tulafono, le Iunivesite o Harvard i Amerika (Masters of Laws). Na ia taua I le Leitio Faavaomalo a NZ I le vaiaso nei o le lē malamalama o le toatele I le teuteuga o le vaega 44(1A) o le faavae ona e le’o manino lona faaupuina
Na ia taua o gaioiga a le Ofisa o le Komesina o faigaplaota o loo mulimulita’i lava I le teuteuga o le faavae ma o le lē manino e mafua mai I le faaupuina o lea vaega o le teuteuga o le faavae.
Na ia taua foi e faigata ona tuuaia se tasi I le eseese ai o faauigaga o tagata taitasi I lenei vaega o le teuteuga o le faavae ona o le lavelave o lona faaupuina.
Taua e Fuimaono o lona malamalama I le aloaia ai o le teuteuga o le faavae, vaega 44 (1A) ma i’u ai I le tuuina atu e le Ao o le Malo o Samoa o le tusi faamaonia o le tulai mai o Aliimalemanu Moti Momoemausu Alofa Tuuau ma sui faaopopo mo Tamaitai o le Palemene e talafeagai lelei faaletulafono ma o loo faailoa lea I le Faavae Vaega 44 (1A) (a), lea e faaupu faapea
I le noatia ma le fai fuafua i lenei Mataupu, e tatau i Sui Usufono tamaitai o le Fono Aoao Faitulafono ona:
(a) aofia ai se fuainumera maualalo a itiiti mai e 10% o Sui Usufono o le Fono Aoao Faitulafono ua faamaoti mai i lalo o le fuaiupu (1) lea e mo le aveesea ai o se tulaga masalomia, e toalima (5) o lo o i ai i le taimi nei.
O le finau la a le Vaega faaupufai o le Faatuatua I le Atua Samoa ua Tasi o loo agai tonu I le aofai e toalima (5) ma na atoa le toalima o tamaitai o le Palemene I sui a faipule lea na faamanuiaina mai I le faigaplaota.
Peitai taua e Fuimaono e lua faafitauli o le faauigaga o lea vaega o le teuteuga o le Faavae.
1. O le finau a le FAST e le’o o gatusa ma le faaupuina o le Vaega 44 (1A) o le Teuteuga o le faavae.
O le faaupuina o le teuteuga o le Faavae Vaega 44 (1A)(a) o loo manino mai ai o le aofai o nofoa o le Palemene mo Tamaitai e faaopopo lea faaaoga ai pasene o nofoa o loo avanoa I le palemene ma e tatau ona ausia le 10 pasene.
Mulimuli ane ona faailoa lea o le Vaega 44 (5) lea e faamatala ai le auala e maua ai le 10 pasene, ma o lea teuteuga na pasia I le masina o Novema 2013. I lea taimi e nao le 49 nofoa o le Palemene.
Faamanino mai e Fuimaono e taua tele le faauigaga o le numera 5 i totonu o le Teuteuga o le vaega o le faavae aua o loo faamatala mai e le upu “presently” poo le taimi nei. O lona uiga e mafia ona sui lenei fainumera mai le 5 o nofoa o le palemene mo tamaitai pe a fai e iai se suiga I le aofai o nofoa o le Palemene o Samoa.
Na ia taua I le amataga o le faataatiaga o le teuteuga o le vaega 44 o le faavae sa tatau ona tagatagai lelei i lona faaupuina ma auiliili lelei ina malamalama ai tagata nuu o Samoa.
O nisi nei o mataupu o le a talanoaina I le faamasinoga o le talosaga a le FAST ina ia soloia le nofoa faaopopo a tamaitai I le Palemene lea o le a galulue ai Faamasino e toatolu I lona auiliiliga le afioga ia Lesātele Rapi Vaai, le afioga ia Vui Clarence Nelson ma le afioaga ia Mata Keli Tuatagaloa. Ma o le a nafa foi nei faamasino o le faamasinoga maualuga ma le faamatalaina o le agaga moni (intent) o le teuteuga o le vaega 44 o le faavae.
