Ua faailoa e le Pelesetene o le Malo o Saina i le feiloa’iga ma le ta’ita’i o le malo o Samoa i le vaiaso nei, e lē aiāina e lona malo pulega a isi malo.
Ua faailoa ai foi e le Pelesetene o Saina e pei ona lipotia e le vaega faasalalau a lea atunuu le China Daily sa ave ai le faamalo a le Palemia o Samoa le afioga Fiame Dr Naomi Mataafa i le Pelesetene ona o lea tulaga.
O Samoa le tasi o atunuu o le Pasefika na muamua fai paaga ma lea malo talu mai le tausaga e 1975 ma o loo faaauau pea.
Ua faaalia i le lipoti a le China Daily o le saunoaga a le pelesetene o Xi Jiping na ia faailoa ai o fesoasoani uma a Saina mo atunuu e pei o Samoa o se faailoga o le fia fesoasoani ma lagolago i taumafaiga o atina’e o isi atunuu ma malo, ma e leai ma ni manoa o tautau ai i tua o ia galuega fesoasoani.
O loo faailoa foi i lea lipoti se vaega o le saunoaga a le tamaitai Palemia i le feiloa’iga ma le ta’ita’i o lea malo, sa faailoa ai e le afioga Fiame o fesoasoani uma a lea malo mo le Pasefika, e leai ni aiaiga faapolokiki o iai.
O feiloa’iga a ta’ita’i o malo e lua na taualuga iai le iva aso o le asiasiga taualoa a le ta’ita’i o le malo i se valaau faaaloalo a ta’ita’i o le Malo o Saina.
