E toatolu Ofisa Sili o Matagaluega a le Malo ua toe filifilia nei e faaauau le latou galuega o le vaaia o a latou Matagaluega filifilia, ma le sui e toatasi ua faamanuiaina nei mo le uluai taimi e avea ma Ofisa Sili o le Matagaluega o Tupe.
O le tamaitai ia Saoleititi Maeva Betham Vaai lea ua filifilia nei e avea ma Ofisa Sili o le Matagaluega o Tupe talu ona tau saili se tasi e sui tulaga i lē sa avea muamua ma Ofisa Sili o lea Matagaluega lea na faamavae i le tausaga na te’a nei.
O le taimi muamua lea ua tōfia ai lea tamaitai i lea tofiga, ma sa amata lana tautua i le Matagaluega o Tupe i le tausaga e 1992 mai lava i le Officer Level seia oo ina ua avea ma Ofisa Sili Lagolago i le 2009, ona aga’i ai lea e faigaluega i le faletupe o Asia ma le Pasefika i le 2009 ma o le taimi lenei o loo faauluulu iai le Ofisa o ele Faletupe i le Lalolagi i Samoa. Ua manatu le Kapeneta ua lava tapena Saoleititi e tauave le tofi mo le isi 3 tausaga.
O le Ofisa Sili o le Matagaluega o Faalapotopotoga a le Malo le MPE lea ua toe filifilia ai le susuga ia Elita To’oala. O ia lea o le uluai faauluuluga ina ua faatū lea Matagaluega ma o loo faaauau pea lana tautua e oo mai i le asō. O fautuaga uma na taatia mai e le komiti sa iloiloina le faiga o faatalatalanoaga o lenei avanoa ua faapena ona talisapaia ma faamaonia e le Kapeneta.
O le Ofisa Sili o Kamupani o Pulega o le Faaputugatupe teufaafaigaluega o Mavaega Tausi a Samoa le UTOS ua toe filifilia ai le susuga Tevaga Viane Tagiilima. E pei ona silafia o Tevaga sa tauave lea tofiga mo le 3 tausaga talu ai ma ua toe filiiflia e le Kapeneta e faaauau mo le isi 3 tausaga i luga foi o fautuaga a le komiti sa iloiloina le faiga o iloiloga.
Ma le Ofisa Sili o le Matagaluega a le Palemia ma le Kapeneta ua toe filifilia ai le afioga ia Agafili Shem Leo e faaauau ai lana tautua i lea tofiga mo le isi tolu tausaga .
Na ave ai foi le faamalo a le Tamaitai Palemia iai latou lea ua toe filifilia ma faamanuiaina i nei tofiga taua.
