O le Aso Faraile asau le aso muamua o le masina o Iulai o le a amata ona toe tafe atu ai le isi faamanuiaga tau tupe i le tufatufaga poo le dividend a le faalapotopotoga o le faaputuga tupe o le lumanai manuia le NPF, i le ‘au faisaofaga i latou o loo teu faafaigaluega se vaega o o latou totogi i le faalapotopotoga.
Ua faailoa lea faamanuiaga e le Ofisa Sili o pulega o le NPF i auala o faasalalauga a le faalapotopotoga i luga o le api o foliga, a o tālia ai se taimi e faailoa faalauaitele ai e le Minisita o le NPF le afioga i le tamaitai minisita o Tupe le aofa’iga o se pasene o le a totogi atu i le ‘au faisaofaga.
O le masina o Aperila na maua ai se isi faamanuiaga mo le faailogaina o le 50 tausaga talu ona faavae le NPF, ma o Tesema o le tausaga nei e toe maua ai le isi vaega o loo totoe o lea meaalofa o le aso fanau o lea faalapotopotoga faaputu tupe a le Malo. Ua faailoa e le Ofisa Sili le tofa Pauli Prince Suhren o le a faaaogā pea fesoota’iga i upega tafailagi a le NPF e totogi atu ai le faamanuiaga ua fuafuaina mo le masina fou, e pei ona sa faatino i le faamanuiaga na totogi atu i le masina o Aperila.
Ua fautuaina ai le ‘au faisaofaga ina ia lesitala i le fesoota’iga i le upega tafailagi a le NPF lea e tuusa’o ai le tupe a le fai saofaga i lana teuga tupe i soo se faletupe i totonu o Samoa.
