O le faatuina i le atunuu o kamupani e gaosia malosiaga faafouina e maua ai le eletise mai le la, ma le matagi o ni auaunaga sa iai le talitonuga o le a maua ai se eletise taugofie, peitai e le o le tulaga lea o loo iai.
Ua faailoa e le Minisita o Galuega Tetele o loo iai ma le vaaia o le faalapotopotoga o le malosi faaeletise, e iai se kamupani o loo tu i le ogatotonu o auaunaga a kamupani o malosiaga faafouina, o loo faia iai se sailiiliga poo ai e ana, a o ai foi nisi o faisea ai.
O le kamupani lea ua tu nei i le va o le faalapotopotoga o le malosi faaeletise, ma kamupani e gaosia malosi faafouina e maua ai le eletise ma ua faafaigata ai ona alu i lalo le tau o lea auaunaga tāua.
Na tulai le sui faipule o Falelatai ma Samatau sa avea ma Pule Sili o le faalapotopotoga tau eletise i le sefulu tausaga ua tuanai, ma faailoa i le palemene, sona finagalo e tau faamalamalama ai lea kamupani, peitai o le fautuaga a le Fofoga Fetalai e sili ona tālia le lipoti o le suesuega o loo faia o le a folasia ai i le Palemene faamatalaga tonu i le kamupani o le Gridmarket.
O lea kamupani na faailoa e le Minisita o le matagaluega o puna’oa faalenatura ma siosiomaga i le Palemene, o loo iai lona aafiaga i le mataupu o le carbon credit lea e faapea o se tasi o alagatupe maua e fesoasoani i le tamaoaiga o Samoa.
