O le usu a lele i le paia o le afioaga o Uafato i le afio o Tuimalatu ma ona alo tutusa, o le alalatai o ituala ma le susū o Letogia’i ma Aumua, o Sa la i’asa ma le afifio o Fuimaono ma le Taauso, na faatino i le faafotu tupu o le suafa Lua’italolelei lea ua nofo ai se tasi o suli o le suafa, o se tamafanau a Uafato ae o se fitafita sa tautua i le vaegaau a le Malo tele o Amerika, le afioga Tuifagaloa Afu Dr Lefaoseu III.

O le faaeeina o le suafa tamalii sa molimauina e se sui o le Kovana o le malo o Amerika Samoa, ona o le afioga Lua’italolelei Afu Tuifagaloa Lefaoseu III, o le faatonu lagolago o le ofisa o le Kovana o le faigamalo a Tutuila ma Manu’a i le Setete o Hawaii.

O le faafotu tupu na faatino ai foi ma nofo i suafa tulafale o le Faasoutele ma le Ataiti.