Ua toe faafoi le 10 miliona a le Faalapotopotoga o Taui o Faalavelave Faafuasei, sa fuafua e tufatufa i tagata faigaluega i le atunuu, i latou sa totogi ma o loo totogi le tasi le tala i lea faalapotopotoga e avea o se tupe e taui ai sona aafiaga mai se faalavelave faafuasei pe a aafia ai le saogalemu o le ola ma le soifua.

O lea sefulu miliona tala e pei ona faailoa e le Minisita o lea faalapotopotoga tuma’oti a le Malo le tofa Leatinuu Wayne Sooialo i se faatalanoaga i le TV2 i le vaiaso nei, sa iai lana fuafuaga e avea o se faamanuiaga mo tagata faigaluega faapei o le meaalofa a le NPF. Peitai sa ia ave se pepa i le Kapeneta na faamatala ai le faaaogāina o lea tupe tele, ae ua avatu ai le fautuaga e toe faataatia e mafua ona o tulafono a le faalapotopotoga o taui o faalavelave faafuasei, e lē o mafai ai ona faia se fuafuaga faapea.  

O le tasi o vaegatupe e sefulu miliona foi sa faamoemoe e tufa e fesoasoani ai i le au faipisinisi ona o faaletonu mai aafiaga o le faama’i Koviti-19 ua faaalia foi ua lē mafai ona tufatufaina uma i le to’atele o le aufaipisinisi e mafua i aiaiga fou ua faataatia e le Matagaluega o Pisinisi Alamanuia ma Leipa o loo i lalo o le vaaiga a le minisita le tofa Leatinuu Wayne Sooialo.

O ia aiaiga fou na ta’ua e le Minisita ua faafaigata ai ona faamalieina tuutuuga a le Matagaluega e avanoa ai ona agavaa pisinisi latou te maua se vaega o le fesoasoani tupe mai le Malo e sefulu miliona tala.