“E lelei pea le Atua”. O upu nei a le alii sa avea ma faiaoga ulu o le aulakapi taitoasefululima (15) a le atunuu, Vaovasamanaia Seilala Maposua, e faaleo ai lona loto faafetai mo lona taimi a o avea ma faiaoga o le ‘au o le Manu Samoa.
I luga o le itulau a Vaovasamanaia le Instagram, na faailo ai le agaga faafetai o lenei alo o le atunuu i le avanoa na tauaveina mo le 4 tausaga.
Na ta’ua e Vaovasamanaia, o se mitamitaga ia te ia lona mafai ai ona tauaveina o lea tofiga tāua mo nei tausaga e tele.
Ma i lea taimi na fai o ia ma avefu’a o lona atunuu, ekalesia, aemaise o si ona aiga.
Sa faailo le agaga faafetai o le alii i le Lakapi Samoa mo le avanoa e na te taitaia ai le ‘au tele a Samoa.
Na ia ta’ua o se avanoa na faaali ai ona agavaa mo le tofiga e lē gata i Samoa ae o avanoa faavaomalo.
E lei faagaloina i le folasaga a Vaovasamanaia tagata ma sui taitasi na o latou galulue faatasi a o ia tauaveina le tofiga, i le tau’au fesoasoani na lafo atu i lona taimi.
Sa faafetaia foi e Vaovasamanaia tama taaalo uma o le ‘au a le Manu Samoa mo le mafutaga, ae o le avanoa na tuuina atu ia te ia e taitaiina ai i latou i taaloga eseese.
E lei galo foi i le alii si ona aiga, toalua ma si ana fanau i lo latou lagolagosua a o feagai ai o ia ma le faatinoina o le galuega.
Sa faaiu le folasaga a le alii o Vaovasamanaia e faapea, “Samoa e, faafetai mo mea uma. E lē galo le alofa. A iai se sasi poo se mea faaletonu, faamalulu atu ma faamagalo mai lenei tagata. Faamanuia le Atua Samoa ma ona tagata”.
Mo le silafia o le susuga ia Mase Mahonori Schwalger ua filifilia nei e avea ma Faiaoga ulu o le ‘au a le Manu Samoa.
