Ua 16 tausaga talu ona faafaigaluega e le kamupani o le Yummy Fruit i Hastings Niu Sila tagata Samoa o loo faimalaga atu i le polokalame o galuega faavaitaimi.

O Poutasi Falealili e pei ona ta’ua e le Afioga Toasavili Len Thompson o le Pule a le Kamupani Yummy Fruit, o se tasi lenei o afioaga sa taulamua i le faatinoina o aumalaga i galuega faavaitaimi e ala lea i se faiga faapaaga ma lenei kamupani.

“O le Afioga Tuatagaloa Joe Annandale o se tamalii sa tele lona sao i lenei foi vaega, sa taimua i nei avanoa maua ai foi galuega fesoasoani i tagata Poutasi.

“Ae o le taimi lenei ua mafai ona maua avanoa o nisi mai le motu tele i Savaii ma isi afioaga iinei Upolu.”

Na saunoa foi Thompson e tusa ai o nisi o vaega e utagia ai e aiga o loo iai o latou tagata i galuega faavaitaimi.

“O loo tumau aiaiga ma nisi foi vaega e ao ona utagia e i latou mai Poutasi o loo malaga i nei galuega.

“I lalo o le faalapotopotoga o atina’e a Poutasi o loo tumau le tulaga i auala e faaaogaina ma le tatau ai seleni o loo maua mai.

“E silasila poo alu aogā le tupe poo ese le tulaga o faaaoga ai.”

E lima tausaga talu ona toe faimalaga mai Thompson e asia foi atina’e o loo faatino i tupe maua mai i galuega faavaitaimi.

“O le taimi muamua lenei ua toe asiasi ai i atina’e o loo faatino e nai tagata foi o loo galulue i galuega faavaitaimi.”

E silia ma le 180 le aofai o i latou mai Poutasi o loo galulue i avanoa i lenei kamupani.