A o faagasolo galuega a itumalo faapalota ua faamatuu iai vaegatupe o le poloketi tasi le miliona, e matimati ma faatelea’i polokalame o atina’e eseese mo le manuia o aiga ma tagata o itumalo taitasi, o le Aai o Fiti i le itumalo o le Vaimauga 4, ua latou faatau ni tanevai se 22 tai 2 afe lita i le faamoemoe e tofu aiga uma e 22 ma tane vai.
O loo tapena le isi fuafuaga a lea nuu o le itumalo e fausia fata lapisi mo aiga uma o le Aai o Fiti lea e silia i le lima selau tagata o loo alala ai.
Na faaalia e se tasi o tina o le komiti o le fono faavae a Vaimauga 4, o loo faatamo’eina galuega o le poloketi tasi le miliona, le faletua o Tonu’u Fuamoli Amituanai Misi, o loo faagasolo fuafuaga a sui o Nuu e toaiva o le itumalo ia latou atina’eina ua faatulaga e faaaogā iai seleni o le poloketi, ma o le Aai o Fiti o le isi lea nuu ua mae’a faatau a latou tane vai.
O se faatalanoaga ma le faletua o Tonu’u Fuamoli Amituanai Misi, o se sui o le komiti o le fono faavae a Vaimauga 4.
O le sui faipule o le itumalo le afioga i le Minisita o le Matagaluega o Leoleo, Falepuipui, ma le Ola Toe Fuataina, sa ia molimauina lea vaega o le poloketi tasi le miliona a lona itumalo.
