Ua faaalia le agaga faafetai o le faiaoga ulu o le Lakapi Samoa i ‘au a tamaitai, Filoi Eneliko i le maua ai o le fesoasoani mai Ausetalia i le atinae o le taaloga o le Lakapi i le Pasefika aemaise Samoa.
I se pepa o faamatalaga i luga o upega tafailagi a le Brumbies ACT Rugby na ia faaalia ai foi le telē o le fesoasoani ae faapea avanoa o le a maua mo le autaaalo ma faiaoga o le taaloga mai atunuu i fafo e ono galulue ma taaalo ai mo le Brumbies.
Na faasoa mai le tamaitai faiaoga, “Ua iloa e tamaitai Pasefika o loo iai avanoa mo latou, ona o le tele o taimi e gata lava lo latou taumafai ma le taaalo i totonu o o latou atunuu.”
Ma ua ia viia ai le vaega o le Rugby Australia ma le PacificAus Sports mo lea fesoasoani auā le atinae o le taaloga mo tamaitai Pasefika.
E lē gata mo le autaaalo aemaise i latou o loo iai le faamoemoega e fia avea ma faiaoga o le taaloga lakapi.
Na māua i faamatalaga o le tamaitai ia Filoi Eneliko na auai i totonu o le kalapu a le Brumbies i le tausaga 2023, na ia faaalia lona fiafia mo isi autaaalo o le a mafai ona latou mauaina le avanoa e atiae ai a latou taumafaiga i le lakapi.
Mo le silafia e $14.2 miliona le aofai o le fesoasoani ua faamatuu mai mo lea faamoemoe, ma o se fesoasoani na faipaaga ai le Australian-Pacific Rugby Union Partnership ma le malo o Ausetalia, e tauala mai le polokalame o le PacificAus Sports.
