O le taeao nei lea na faafeiloai ai le Pulenuu o Hastings Sandra Hazlehurst ma le aumalaga mai Niu Sila i se ‘ava o feiloaiga sa faia lea i le maota o tagata tafafao maimoa mai fafo.
O sui o lenei aumalaga e aofia ai sui mai le fono faaitumalo a Hastings, pule o kamupani o loo galulue ai tagata Samoa i galuega faavaitaimi ma sui o le a auai i le fonotaga o le We Trade and Business Summit.
I le mae’a ai o le ‘ava o feiloaiga na saunoa ai le Minisita o Pisinisi Alamanuia ma Leipa, Afioga Leatinuu Faumuina Asi Pauli Wayne Fong e tusa ai o lenei faamoemoe.
“O lenei fonotaga o se auala tāua lea e faailoa ai ma fauina ni auala e mafai ona atina’e sa oe lava pisinisi e ala i le fesoasoani ma le galulue faatasi.
“E pei ona silafia le tulaga sa iai le lalolagi i le faamai o le Koviti-19 na tele se aafiaga i le itu tau pisinisi ona o puipuiga sa faatinoina auā le saogalemu o le mamalu lautele.
“Ma e iai le faamaoniga o nei aafiaga i le soifua manuia o tagata e pei ona tatou iloa i lenei vaitau.
“O lenei la fonotaga e aogā lea mo tatou tagata o loo taumafaia pisinisi e tele ai se fesoasoani ia latou pisinisi i nisi foi o faasoa ma mataupu o le a folasia lenei fonotaga.”
O lenei fonotaga o le a amatalia mo le lua aso i le potu fono a le faletalimalo i Taumeasina.
