O le aso ananafi na faafeiloai aloaia ai e Samoa i Aukilani e tauala atu i lana Fono Faufautua, le taunuu mai o le Konesula Aoao o Samoa, le Afioga Afemata Palusalue Faapo Lemalu ma lona faletua, faapea foi le Komesina o Fefaataua’iga, Afioga Vaatuitui Apete Meredith.

O le itula e 11am i le taeao na potopoto atu ai Samoa i le Maota o Samoa i Magele, o iinā na amata ai le faatasiga i se sauniga lotu na taitaia e le susuga i le faifeau malolo manumalo a le Ekalesia Metotisi, Rev Masunu Utumapu ma le afioga ia Father Michael Alipia Endemann, a o tapuaia e isi uma faafeagaiga o ekalesia eseese o loo galulue i totonu o Aukilani.

O le afioga LeiatauaLetauā Savea Peseta Lavea na tu tootoo i lea taeao ma faasolo ai le polokalame i le ‘ava o le feiloaiga ina ua mavae le lotu.

Na alo faleupolu ile latou faatau e saili se lauga o le aso, tasi ai le faafitiga aleaga i le fetalaiga ia Fepuleai Semi e na te faia le lauga e agatonu ai le aso faapitoa i le feiloaiga a Samoa i Aukilani ma le latou Konesula Aoao o Samoa.

Na faai’u le aso i le saunoaga autu a le afioga i le Konesula ma ia faailoa ai galuega e fitoitonu i le ofisa o le Konesula ma lana auaunaga o le a faatino e avea ai ma sui o le Malo o Samoa e feagai ma le mamalu o Samoa o loo nopia’i i Aukilani nei.

Na sunoa foi le afioga i le Konesula, o se taimi muamua lenei ua tofia ai ma se sui Konesula e lagolagosua i lana galuega, e pei ona tofia ai le faletua ia Telesa, Mrs Dorothy Imeleta Ah Ching Meredith.

O le Afioga Vaatuitui Apete Meredith o ia o le Komesina o Fefaataua’iga (Trade Commissioner), ma o lona lua ai lea o taimi ua tofia mai ai Apete i lea lava tofiga i Niu Sila nei.