O le faafaigofie ona feasiasia’i o tatou tagatanuu i le va o Samoa e lua, o se tasi o vaega tāua i mataupu ua faamautu i le fono lona lima o le Atoa o Samoa, e pei ona iai nei se silasila mamao ia lē na o le fitu aso e mafai ai ona nofo i Amerika Samoa e aunoa ma se pemita mo tagata mai Samoa Tutoatasi e ulufale ai i le teritori e faapea foi i tagatanuu o Tutuila ma Manu’a e ulufale mai, ae ia suia i le sefulu aso.
O se suiga o le a toe iloilo e pei ona tau fai malilie iai ta’ita’i o faigamalo a Samoa e lua i le mae’a o lea fono faavaomalo.
Ua faailoa i faamaumauga o le polokalame sa faata’ita’i ai le malaga e fitu aso e aunoa ma se pemita, e 1,371 tagatanuu o Amerika Samoa na ulufale i Samoa Tutoatasi, ae 870 tagatanuu o Samoa na malaga ai i le teritori.
O le numera lea o tagata na femalagaa’i i le polokalame lenei ua faafaigofie ai femalagaa’iga na amata i se tulaga faata’ita’i ia Oketopa o le tausaga na te’a nei e oo mai i le faaiuga o Aperila o le tausaga nei.
Ua faamauina ai i le mae’a o le fonotaga se talosaga a le Malo o Samoa ina ia galue i le ofisa o femalagaa’iga a le tatou Malo se tagata o se ofisa o mataupu tau femalagaa’iga mai Amerika Samoa i le naunautaiga e fesoasoani i le faia o pepa malaga mo o tatou tagata e fia malaga i Amerika Samoa.
