O le tausaga lenei e atoa ai le lima tausaga talu ona amata mai le kalapu o le Oats Club i Otahuhu. 

O le tausaga 2018 na amata mai ai lenei kalapu ina ua faamavae aloaia le afioga ia Aiolupotea John Roache mai lona tofiga peresetene o le Aukilani Samoa ae see mai loa amata le faiga fou lenei i le fale i Otahuhu ma toe fai se faiga e toe lifi ai i luga le kalapu i Otahuhu ua fai si pa’ū maualalo i le mea sa iai. 

O le tofa saili o le afioga ia Aiolupotea John Roache, o le fale pito i lalo o le fale i Otahuhu ua tatau ona amata ai se bar i lalo, ma o lea sa talanoa ai loa le latou komiti mo se igoa e tatau ona faaigoa ai, ma o lea sa faaigoa ai loa o le Oats. 

O le Oats o le igoa ogatotonu sa iai le kalapu i nisi o tausaga ua leva, ma o lea sa latou toe faaolaolaina ai loa lea igoa sa iai. 

E tele faafitauli sa toe amata ma faaolaola mai ai le kalapu, e ala lea i sailiga seleni. 

Sa tagi lava i lima ma faaaogā mai tupe a le komiti mai lana taga e tau faufau ai le galuega, auā e lē iloa pe faafepefea ona tau amata.  

O le susuga ia Pinati Williams ma lana faili sa amata tata ai i po o Aso Faraile mai le toafa i le toalima tagata, ona sosoo atu ai lea ma le afioga ia Galumalemana Tenari Tautua ina ua pisi le susuga ia Pinati ma ua amata ai lava ona solosolo i luma galuega a le kalapu. 

O le faili a le susuga ia Penani, ET, Melenau ma Saia na faaauauina mai faafiafiaga ina ua mae’a le susuga ia Tenari Tautua seia oo mai le taimi nei. 

O po o le Aso Faraile o loo tata ai le faili ma fai ai le steak auā le fofoga taumafa o le atunuu. 

Ma o se nofoaga ua fai mo tagata matutua e agai atu e evaeva ai i faaiuga o vaiaso mai fai ai a latou taumafataga. 

Ma o se fiafiaga sili lea i le afioga ia Aiolupotea John Roache ua maua se nofoaga mo nai tagata matutua mo evaevaga. 

O le taimi nei ua tele ina faaaogā le fale i faaiuga o le vaiaso e le mamalu o le atunuu i nisi o latou polokalame faatasi ai ma le Aso Sa lea ua faaaogā e nisi o ekalesia auā a latou sauniga lotu.  

Ua ea le pologa sa iai le komiti i la aso i le faaaogā mai o tupe mai a latou taga e fai ai mea e atinae ai le kalapu ae o le taimi nei ua tele le faamāmā avega ua maua ina ua tele polokalame ua faaoagā ai le fale ua maua ai lava tupe auā lona atinaeina.

O le aso 16 o Tesema o le a fai ai se faafiafiaga a le Oats Club i lona nofoaga autu i Otahuhu e patipatia ai le atoaga o lona 5 tausaga talu ona amata mai. 

Ma o faili lava a tamalii o le atunuu sa amataina mai lenei kalapu o le a faafiafia ai i lea afiafi auā le mamalu o le atunuu o le a molimauina lea po fiafia.