E tolu talosaga ua i luma o le Faamasinoga Maualuga a le afioaga o Leauvaa e faatatau i eleele o loo finauina pea e ui ua mae’a faia iai faaiuga a le Faamasinoga o Fanua ma Suafa.

O ia talosaga e aofia ai le talosaga e faatino ai e le Faamasinoga Maualuga se iloiloga i lea mataupu, o le talosaga e aumai ai se poloaiga lē tumau e taofi ai galuega o loo faatino a Afega faapea ai la ma le talosaga ua aafia aiātatau faaletagata ona o gaioiga ua faatino.

I le finauga a le loia a le afioaga o Leauvaa o Salā Josephine Stowers i le taeao ananafi na ia faaalia ai le tatau ona faalavelave o le Faamasinoga Maualuga ona e tele vaega o eleele ua faaleagaina ona o galuega a le afioaga o Afega, aemaise o loo taatia la latou talosaga toe iloilo i le Faamasinoga o Talosaga ma Iloiloga a Fanua ma Suafa.

Ta’ua e Stowers e iai le malosiaga a le faamasinoga o fanua ma suafa e faalavelave ai i se mataupu pe afai o loo aafia ai aiātatau a tagata soifua.

Ae na faailoa e le afioga i le Faamasino Sili, ua mae’a ona faatulafonoina i lalo o le tulafono o fanua ma suafa 2020, e lē mafai ona toe tagofia e le Faamasinoga Maualuga se mataupu ua mae’a faia iai faaiuga a le Faamasinoga o Fanua ma Suafa.

Peitai na faaalia e Stowers e iai le malosiaga ona e lē o faatulafonoina ma mautinoa foi poo afea e ono gaioi ai le faamasinoga o talosaga ma iloiloga a fanua ma suafa.

Ae na faaalia e Perese i le tamaitai loia, o le faamasinoga o loo ia finau mai ai ua mae’a faatulafonoina pau le tulaga o loo iai e lē o mautinoa se taimi e faagaioi ai.

Faailoa foi e le Faamasino Sili o loo taatia le latou talosaga toe iloilo i le faamasinoga o fanua ma suafa ma e lē mafai ona sopoloa le Faamasinoga Maualuga e tagofia se mataupu ua mae’a tuuina atu i le faamasinoga o fanua ma suafa.

Na finau le tamaitai mo se poloaiga e taofia ai galuega a le afioaga o Afega peitai na faaalia manino e Perese e lē mafai e le faamasinoga ona tuu mai se poloaiga faatopetope e aunoa ma le uia o faiga faatulafono, ma o soo se faaiuga ma ni poloaiga e tatau lava ona fai i auala masani.

O le a toe valaau lea finauga i le aso 3 o Aperila.