Ua agalelei atu pea le Mālō o Ausetalia i galuega o loo faatino a le Matagaluega o le Soifua Maloloina a le atunuu e faatino ai tui puipui o le faama’i koviti-19 ma faatino ai foi suega poo tests e iloa ai tagata ua aafia i le siama.
I se taimi e le’i mamao atu na taunuu ai vailaau o le Pfizer mai lea atunuu e 70,200 ae o le aso ananafi na taunuu ai le soo atu i le 86,000 o masini o le RATs (Rapid Antigen Test) e faia ai suega e maua ai le tagata ua nofo ai le siama o le Koviti.
O le taunuu ai o lea uta tele e faatino ai siaki ma suega o se fesoasoani tele lea i le Matagaluega faapea le Komiti o Faalavelave Faafuasei e ala lea i le tele vave o le faatinoga o galuega ma oo atu ai lea sailiiliga i vaega uma o le atunuu ina ia maua poo ai ua aafia ma faapena ona faia ai togafitiga ma faanofoesea.
I le 70,200 ua foai atu e Ausetalia ua maua ai le aofaiga atoa o lana fesoasoani o le vailaau o le tui puipui o le faama’i i le 134,200.
