E 10,000 le aofaiga o leisi uta o vailaau o le tui puipui o le AstraZeneca o le fesoasoani o le Malo o Ausetalia na taunuu i  le Aso Lua o lenei vaiaso.  

O lea uta ua maua ai le aofaiga e 60,000 o lea vailauu mo tui puipui o le faama’i o le Koviti19 ua aumaia mo Samoa e tauala mai i lana faigapaaga ma lea malo tele ma ua tauaao nei e le Faatonu Sili o le Soifua Maloloina le fesoasoani na tuuina aloaia atu ai e le sui o le Malo Ausetalia i Samoa le tamaitai Hai Komeisna ia Emily Luck. 

O le taunuu o lea uta o vailaau o le AstraZeneca ua toe ave ai ma le tuualalo a le taitai o le Malo le tamaitai Palemia afioga Fiame Naomi Mataafa  iai latou e le’i faia lava tui puipui o le koviti19 ua tatau ona fa’aaoga le avanoa taua lenei ina ia fai ai lona tui mo puipuiga. 

Ua faafetaia ai foi e le Palemia le malo lo Ausetalia ona o le fa’aauau pea ona agalelei atu ia Samoa i ana tapenaga mo puipuiga mai le vairusi o le Koviti19.