O loo faaauau pea galuega laveai ma fesoasoani o loo faamaopoopo i le nofoaga a le ekalesia Kings House Church i le 190 Riverbend Rd i Napier mo nai tagata aemaise lava i latou o tagata faigaluega i galuega faavaitaimi le RSE ua sulufai atu i ai ina ua afaina ma faaleagaina uma e le vai o latou nofoaga sa iai.
Mai lipoti ananafi sa māua ai e lei mafai e le susuga i le faafeagaiga o le Ekalesia ma lona faletua ona toe sao ane i lo la maota ananafi ona o tulaga faaletonu o fesootaiga i auala, peitai la o lea ua maua mai lipoti lata mai, ua mafai ona toe faaolatia ane le susuga i le faafeagaiga ma si ona faletua i Napier i lo la maota ma le aulotu.
O nisi o ata e pei ona tuuina atu i luga, o loo faaalia ai le tulaga saogalemu o loo iai i latou uma i le tausiga a le ekalesia ma i latou uma o loo foai ane fesoasoani, ma na taunuu loa le faifeau Ps Ailaulau Faletutulu, ona faatino lea o se sauniga lotu mo i latou uma o nai tagata galulue RSE o loo api ai i le maota o le ekalesia.
O se vaaiga faagaeetia le lagonaina o le pepese o i latou uma ia latou lava gagana, auā na aofia ai i latou mai Samoa, Tonga, Papua Niu Kini, Vanuatu ma Kilipati.
E maeu le matagofie o le potopoto faatasi o nei alo ma fanau o le Pasefika e ui ina eseese gagana, ae sa fusia faatasi uma i le agaga autasi a o sulufai atu i aao o le Tamā i le lagi mo lana puipuiga, lea o loo tauala mai le agalelei o lenei foi ekalesia.
Ua oo atu fesoasoani e le gata i taumafa a o lavalava mai tagata o le ekalesia, ma amata tufatufa atu ai ia i latou o loo afatia. E ui lava i tulaga faigata ma mafatiaga o loo feagai ma nai nei tagata, ae o loo maitauina le maua pea o le agaga fiafia ma le to’afilemu ma talisapaia le fesoasoani tele o loo saunia e le ekalesia ma le komiuniti mo i latou.
O loo faaauau pea ona motusia le eletise i lea vaipanoa, ma o loo faaaoga taavale e fafaga ai maa o telefoni, lea o loo mafai ai ona maua mai ni faamatalaga lata mai aemaise o ata o loo pueina ma tuuina mai.
O loo talisapaia soo se tasi e finagalo e faia se foai i soo se mea e fia fesoasoani ai i le tausiga o nai nei tagata, poo le tulaga foi o seleni e foai, o loo i lalo le numera o le tusitupe e mafai ona tuu i ai soo se foai tupe:
Napier & Hastings Samoan Assembly of God Community Trust
38-9009-0297745-00
Ref: Gabrielle relief
