O le a faaauau pea ona iloiloina i luma o le faamasinoga maualuga le tagi o le faigapalota faasaga i le sui filifilia o Sagaga No.4 Tuisā Tasi Patea lea ua maea ona faamavae ina ua lē talia e le faamasinoga le talosaga e ave ai tua lea tagi.
O le afioga ia Tuisā na tauva i lalo o le faamalu a le vaega faaupufai a le HRPP ma ua maea ona faamavae mai lona nofoa o se maliega ma le sui tauva o le FAST Tagaoatele Poloa ina ia toe ave i tua la tagi ae toe foi e fia se faigapalota laititi.
Ua tau fai maea ona faailoa le ave ai i tua o tagi a sui uma e toalua peitai ina ua valaau le faamasinoga i le Aso Gafua 12 o Iulai e aloaia ai le ave i tua o tagi ma le faamavaega a Tuisā na teena e le faamasinoga le talosaga ma ua faailoa mai ai le aso e fofogiana ai le mataupu.
O le afioga i le Faamasino Sili Satiu Simativa Perese ma le faamasino ia Fepuleai Ameperosa Roma na fai lea mataupu ma na taua e Loia o loo tulai mo vaega uma e lua Alex Su’a ,a Arthur Lesa o lenei mataupu o le a fofogaina i le Aso 27 Iulai 2021.
E 6 moliaga o le totogi o tagata ma le 2 moliaga o le faatosina o tagata palota i le aso o le faigapalota o loo faia faasaga ia Tuisā ae mo Tagaloatele e 8 moliaga o le totogi o tagata ma le faaogaina lea o loo tuuaia ai nei.
