Ua faamanino mai e le taitai o le atunuu o le ā faaauau ai ona iai pea le atunuu i le laasaga 3 mo le isi vaiaso afua atu i le vaeluaga o le po nanei seia oo i le vaeluaga o le Aso Lua, 5 o Aperila ona o puipuiga lava o le faama’i Koviti19 ua aafia ai Samoa.
O le faaopoopoina ai o le vaiaso ua avanoa ai ona faagasolo tui puipui o i latou e le’i maua tui e lua ma le isi vaega o loo fia maua le tui faaopoopo o le Booster aemaise foi o le fa’aauau o tui a fanau mai le 5-11 tausaga le matutua.
O le avanoa foi lea e fa’aauau ai suega poo test e saili ai tagata ua aafia i le siama. O lea ua toe talatala nisi o poloaiga o vavao na amata faaitno mai i le vaiaso ua mavae e pei ona faailoa e le Tamaitai Palemia le afioga Fiame Naomi Mataafa i lana saunoaga faalauaitele i le po anapo e pei o auaunaga masani (essential services) e aofia ai faleoloa, pisinisi talatupe ma faletupe faapisinisi lea o le a amata ona tatala i le 6am seia oo i le afiafi amata atu i le Aso Lua o lenei vaiaso faapea le Aso Tofi ma le Aso toanai.
Ua faasolomuli ai le aiaiga na faia muamua e na’o Aso Lua ma Aso Toanai e tatala ai ia tautua moomia i le atunuu lautele. O le Aso Tofi ma le Aso Faraile o le vaiaso nei e amata faasolo ai tūiga i itumalo i Upolu ma Savaii ma ua faamātagataga ai foi vavao i le femalagaiga o vaa i le va o Upolu ma Savaii e avanoa ai ona femalagaai totino faasino i sē ua maliu faapea foi ona avanoa ai tagata mai Savaii e fia malaga mai Upolu i aiaiga o mafuaaga tatau o loo i poloaiga o vavao.
Ua faailoa foi e le tamaitai Palemia le tatala o malaga masani o le vaa a le malo i le va o Apia ma Pagopago mo le aveina o uta ma le auvatu ai foi o uta i Samoa ma faamomoli mai Amerika Samoa.
Taua e Fiame “O nei vaega uma o le a toe iloilo e le Kapeneta mo isi laasaga ma toe fofogaina ai le atunuu i le amataga o le vaiaso fou. E talosagaina le paia o le atunuu e fesoasoani mai e tulei faatasi a tatou taumafaiga mo le tūiga i lenei vaiaso, o le tatou puipuiga lea e mafai ai ona faaitiitia aafiaga ogaoga e alia’e mai pe a aafia i le faama’i pe i’u ai lava i le maliu. Aemaise lava i le tulaga faigata ua iai le atunuu i le maualuga o i latou ua aafia i faama’i lē pipisi.
O le Aso Lua o lenei vaiaso ua faamoemoe e taunuu ai le uta e 70,000 o vailaau o le Pfizer ma ua faaalia e le taitai o le malo o le a mafai ona faagasolo ai tūiga i le atunuu ina ia vave ona faasopolia.
