E ui i le faaletonu o le tala o le tau i le faaiuga o le vaiaso na mavae atu nei ae le’i taofia ai le asia e le Iuni a Europa le EU o le Maketi a tina ma tamaitai o Toamua, o se tasi o maketi o loo i lalo o le Poloketi o le Nofotane lea e faapaaga ai le Toomaga mo ē Puapuagatia ma le EU e tauala atu i le CSSP.
O nei asiasiga ina ia faamautinoa o loo sologa lelei le faatinoga o nei atina’e faapea foi le faaaoga lelei o avanoa mo tina ma tamaitai o loo aofia ai.
Mo le afioaga o Toamua, o le Poloketi o le Nofotane ua silia ma le 2,000 tina ma tamaitai ua mafai ona iai i lea polokalame ma o oloa o loo iai i lea maketi na maua mai i atina’e eseese na faatino e nei tina ma tamaitai e pei o meataulima.
Na faaali le fiafia a le sui o le EU Shaleshni Prasad i le maoae o le taumafaiga a tina ma tamaitai o Toamua ma o le naunautaiga ina ia faaauau pea lenei galuega.
O se atina’e na ta’ua e tina o lea afioaga ua matuai fesoasoani lelei mo aiga, e le gata i tupe maua e fai ai piliaoga a fanau ae o se avanoa e aoao ai nisi tomai eseese mo i latou.
