O le faaaogāina o mailei mai fafo ua fausia i ni faiga e malu lelei ina ia maua uma meaituaolo aivao ma puaa o loo taaloa, o le a faaaogā ai e le matagaluega o faatoaga ma faiga faiva ni mea pu’eata e mata’itu ai mailei o le a tatao e nuu o itumalo ua amata ona faaaogāina.

O le tuuina atu o mailei i le vaiaso nei i sui o itumalo e 6 i Upolu ua amata ai lenei polokalame na faailoa ai e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, o ia mea pu’eata o ni video cameras o le a iloa atu ai e le aufaigaluega a le matagaluega ua feagai ma le polokalame le taimi e o ane ai meaituaolo i mailei, ma logo ai sui o nuu i le taimi e tatau ona faapalasi ai le neti tai foliga i se upega, ina ia maua ai meaituaolo ma faalalo loa i se laau malosi.

O se isi lea o galuega na faaalia e le minisita e manaomia ai le lagolago a le matagaluega o leoleo, falepuipui ma le fuataina.

Le Minisita o Faatoaga ma Faigafaiva susuga Laauli Leuatea Polataivao Fosi Schmidt i se vaega o lana saunoaga i le tauaaoina atu o mailei puaa se’i tulou i sui o itumalo e ono i Upolu ua amata ai le polokalame e aofia ai Falelatai ma Samatau, Siumu, Lefaga ma Faleaseela, Safata i Sasae ma Safata i Sisifo, Anoamaa i Sasae ma Anoamaa i Sisifo ma Falealii i Sasae ma Falealili i Sisifo.

O meaituaolo uma e maua i mailei e fai iai le pule a le nuu o se itumalo i le faaaogāina mo mea taumafa.