O le vaiaso nei ua faaauau ai pea taumafaiga mo le unaia o le faia o tui puipui I Aukilani ma o le taumafaiga ua faatino ile vaiaso nei e aofia ai le faaaogaina o vans mo le faagasologa o le faia o tui puipui.
I le pepa o faamatalaga mai le Northern Region Health Coordination Centre (NRHCC), ua faailoa ai e 11 vaxi vans ua faaaogaina e providers poo auaunaga tau le soifua maloloina a Maoli ma le Pasefika mo le faaaogaina I lea taumafaiga atoa ai ma le 44 o Campervans o le a faagaioia lea faamoemoe I Tamaki Makaurau i ni nai vaiaso o lumanai ai.
Ua lipotia le maea saunia lelei o ia vans mo le faatinoina ai o tui ma faatotogaina foi i mea e manaomia mo le teuina lelei o tui.
O nei taavale poo vans o le a fesoasoani ai I auaunaga faale soifua maloloina I le aai ina ia faaoo atu tui puipui I komiuniti e faigata ona oo atu iai le faigatui.
E le gata I le faatinoina o lea tulaga ae o le a fesoasoani ai foi le aufaigaluega i ia vans e faamalamalama nisi o fesili e tuuina ane e le atunuu faatatau i tui puipui.
Saunoa le faatonu o le auaunaga lea, Matt Hannant e taua tele faaauau pea ona saunia o auala mo le faaoo atu o tui puipui I tagata aemaise o loo vaaia pea I le taimi nei isi cases fou o aliae mai i itu eseese o le aai.
O vans muamua la e 11 o le a faatautaia e le Huakina Trust ma le Turuki Healthcare faapea foi ma le South Seas Healthcare, ma leisi van o le a faaaogaina e le Coast to Coast Healthcare.
