Ua matuai faaleo le lē fiafia o le peresetene o le Iuni a leoleo i amioga a se kegi na vaaia i se taaloga lakapi i Hastings i le Aso Toonai na tea nei na vaaia ai le tafana ane o le ‘au na malaga atu i Hastings mo lea taaloga.
Ua faailoa i lipoti a le Newshub le faamatalaga a le alii peresetene o Chris Cahill o uiga na vaaia i le mataupu lea ua atagia ai le matuai manaomia o se faiga a le Malo e fai faasaga i kegi.
Fai mai le faamatalaga i le lipoti o se pue maualuga i le taimi o le taaloga i le va o le ‘au a le Tamatea Arikinui i Hastings ma le Young Maori Party mai Napier na afua ai le vevesi.
Fai mai molimau i le Newshub na vaaia ai le au lagolago a le ‘au lea a Hastings ua agai i totonu o le malae ma auupega e pei o agaese ma mumusu e oese ma le malae ma iu ai ina taofia le taaloga faatoa 65 minute.
Na ta’ua e nisi o molimau o sui o le kegi a le Mongrel Mob lea sa iai i le taaloga ma e lei mae’a ai ii le mataupu, peitai ina ua faaee taavale a le ‘au na asiasi ane ma agai ese ma le malae na o latou vaaia ai le folo atu o nisi ia i latou.
O faamatalaga mai le lipoti ua ta’ua ai e le ‘au lea na tafana atu le latou taavale ma e fā lelei isi taavale na tuli atua i latou ma toe foi ane ai i le malae taalo o loo iai se vaega tele o leoleo.
O le faamatalaga la a le peresetene o le iuni a leoleo i luga o AM i le vaiaso nei ua ia ta’ua ai o ni uiga matagā tele ua vaaia i le mataupu lenei ma ua tatau lava ona fai iai se faatatau a le malo.
I se pepa o faamatalaga mai le kalapu na talimalo le Tamatea Club ua ta’ua ai e leai ni sootaga o le kalapu i le kegi lea ma e lē o ni sui foi o le kalapu i latou na aafia i le mataupu.
Puna o Faamatalaga: https://www.newshub.co.nz/home/new-zealand/2024/04/police-association-president-chris-cahill-slams-disgusting-gang-behaviour-at-rugby-game.html
