Ua atoa i le amataga o le masina fou lenei o Iuni le fā tausaga talu ona faatuina le vaega faaupufai o le Faatuatua i le Atua Samoa ua Tasi, e pei ona sa faamanatu lona asofanau i se fiafia na faia i le maota o Tupulaga o le EFKS i Mulinuu i le afiafi o le Aso Gafua o lenei vaiaso fou.
O se asofanau na auai sui lagolago o le pati faaupufai mai itumalo faapalota e 33 na faatau a latou laulau mo le fiafia, ae na auai foi nisi o malo valaaulia, o uo ma aumea mamae a le Faatuatua i le Atua Samoa ua Tasi.
O se asofanau na lafo tupe ai foi itumalo o loo iai o latou sui faipule i le vaega faaupufai e ala i siva Samoa.
O le Faatuatua i le Atua Samoa ua Tasi na faatoa suia iai pulegamalo faatemokarasi a Samoa i le tuanai o le 40 tausaga o tu malo le vaega faaupufai e puipuia aiātatau a tagata.
O le palota tele o sosoo ai nei a le atunuu o le a toe tauivi ma finau ai le Faatuatua i le Atua Samoa ua Tasi pe tumau le lagolagoina pea e le atunuu e avea ma faigamalo.
O se faiga filifiliga foi o loo taualo iai foe a le vaega e puipuia aiātatau a tagata, pe toe foi atu le lagolago a le atunuu sa iai i le tele o tausaga o avea ma faigamalo.
