E lua masina o le a faagasolo ai galuega mo le toe tapenaina o le malaevaalele i Fagalii ma le fuafuaga o le masina o Oketopa o le tausaga nei, e toe tatala ai Fagalii mo malaga a valele laiti o le Samoa Airways, ma le Talofa Airways i le va o Apia ma Pago Pago, ae faatino ai foi ma malaga a le Samoa Airways i le va o motu o Upolu ma Savaii.

Ua faailoa lea fuafuaga e le Minisita o Vaalele Sivili o loo iai foi le pulega o malaevaalele le tofa Olo Fiti Vaai, ina ua taliu mai le usugafono a le tamaitai Palemia ma nisi o Minisita o lana kapeneta i le mae’a o talanoaga ma feiloa’iga ma ta’ita’i o le faigamalo a Amerika Samoa. O le vaiaso na te’a nei na tapena ese ai le auaunaga a taavaleafi a le matagaluega o Leoleo ma Falepuipui ma le Ola Toe Fuata’ina sa faamautu i le malaevaalele i Fagalii ma ua faapea foi ona faasee ese le ofisa o su’esu’ega faalotoifale i amio a leoleo le Police Professional Standards Unit sa faamautu foi i Fagalii. 

O le tasi o mataupu sa faailoa e le Minisita o Galuega Tetele ma pulega o malaevaalele faapea le faalapotopotoga o vaa a Samoa, o le toe tautua o le tasi o vaa o le faalapotopotoga le Fotu o Samoa o loo mana’omia tele i malaga i le va o motu o Tutuila ma Manu’a, o se tasi o mataupu sa folasia i talanoaga i le va o Samoa e lua. 

Audio cut: Olo Fiti Vaai 

Le afioga i le Minisita o Galuega Tetele e aofia ai le pulega o malaevaalele, o vaalele sivili ma le faalapotopotoga o vaa a Samoa le tofa Olo Afoa Fiti Vaai.