Search
radio samoa
Photo Credit: M.J.C.A.

E taulogologo pea le Matagaluega o Faamasinoga i tulafono mo le saogalemu o aiga

E lē o mapu polokalame faatalatalanoa a le Matagaluega o Faamasinoga e tusa ai o le faatalatalanoaina o finagalo o le atunuu i le iloiloina o le tulafono o le saogalemu o aiga.

Na ta’ua e le Minisita, Matamua Vasati Sili Pulufana le auga ma le faamoemoe tāua o lenei polokalame.

“E lē fou i la outou faafofoga siuleo o sauaga i totonu o aiga ma e mafua foi ona tuuina mai pea lenei feau i le atunuu ona o se vaaiga faamomoiloto le tupu pea o nei faafitauli i aiga ma ua aafia ai ma soifua o nisi.

“E lē manofonofo foi la le Malo e tatau ona saili fofo i faafitauli faapenei.

“I totonu o le li’o o le tulafono ma le amiotonu i le Matagaluega o Leoleo ma le Faamasinoga ua lē utuva le tele o mataupu ua aliae mai i lotoifale faaleaiga.”

E pei na ta’ua e le Minisita o loo iai le tulafono e fitoitonu lava ma le puipuiga ma le saogalemu o aiga ua ta’ua o le Tulafono mo le saogalemu o aiga 2013 faatasi ai ma le tulafono i le faamasinoga o aiga ma sauaga i totonu o aiga 2014.

“O nei tulafono sa mafua ona fausia ona ua faatupulaia sauaga i totonu o aiga ma ua siitia ai nei ituaiga soligatulafono.”

“O lenei ua atoa le 10 tausaga o lenei tulafono ae o le luitau o loo iai pea, pe o lelei ea lona faafoeina.

“Ae poo aogā lenei tulafono e faaitiitia ai lenei mataupu i totonu o aiga.”

O le ala lea o le faamoemoe i le tuuina mai o manatu ma finagalo a le mamalu o le atunuu e fesoasoani ai i le auaunaga a le Matagaluega e silasila ai i tulafono o loo agai i le saogalemu o aiga i vaega e faamalosia ai mo le malupuipuia o aiga.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required