O sitiseni Samoa uma, e aofia ai ma i latou o faamautu i atunuu i fafo, e mafai ona faasalaina i le taimi lava e ulufale ai i le atunuu, pe afai e le lesitalaina i le lesitala o faigapalota e pei ona faamalosia ai.

O se tulaga lea sa faamanino i le Palemene i le Aso Faraile talu ai e le Minisita o le Ofisa o le Komisi o Faigapalota, Faualo Harry Schuster, lea foi e avea ma Minisita o Leoleo ma Falepuipui.

Sa toe teuteuina e le aufaitulafono a Samoa le tulafono o faigapalota i le vaiaso talu ai, e ui lava i se finau tetee iai o le Itu Agai, lea e tuuina ai le aiā i sitiseni e palota atu ai i atunuu i fafo.

Ae i tali i fesili a Faipule, sa faaalia ai e Faualo, o tagata palota e lesitala ma ua mae’a lava ona iai i le lisi palota, e pau le mea e fai o le faia o auala o faamaumauga faaonaponei o faailoga e faamaonia ai (biometrics) ina ia faamae’a ai faatinoga o le lesitala fou.

E tusa ai ma lea toe teuteuga, o tagata palota fou uma, e aofia ai ma tagata Samoa ua faamautu i fafo, e tatau lava ona lesitala i luga o auala o fesootaiga (online), ona malaga ai lea i Samoa e faamae’a ai le lesitala i le faia o faamaoniga faamaumauina.