Ua faato’ese le Palemia o le atunu’u le susuga Laaulialemalietoa Leuatea Polataivao Fosi, i le agiga is e lipoti a le nusipepa o le Sunday Samoan, o le Aso Sa na te’a nei o se saunoaga na ia faia i se faatasiga a lona aiga i le 20 tausaga talu ai, sa ia lafo ai upu “Heil Hitler” o se fā’alo i le ta’ita’i logologoa lona tala i lona si’i taua ma pulega sauā fa’afitafita o Siamani ia Adolf Hitler.

O ia upu ma le faatinoina o le fā’alo na faatino e le Palemia ma le faipule o Gagaifomauga 3 i se fa’atasiga fa’ale’aiga i le tausaga e 2007 a’o avea ma Sui Fofoga Fetalai o le Palemene.

O se video e pei ona lipotia e le nusipepa o loo maua ai ia saunoaga ma ua mafua ai le faamaulaloga ua fa’ailoa i se fa’amatalaga fa’alauaitele mai le malo. Ua fa’aalia e le Palemia i lea pepa o faamatalaga e leai se faamoemoe o ia upu ma le fā’alo na ia faia e mo le tagata lautele o le tatou atunu’u, ae poo le a le fa’auigaina ma le faamatalaina o ia upu sa ia lafoina i le faatasiga a lona aiga, ae ua ia lagona e lē talafeagai.

Fa’aalia e Laaulialemalietoa Leuatea Polataivao Fosi e na te matuā tē’ena pulega faa-Nazi a Siamani sa iai, ma so’o se pulega sauā faalemalo.

E mafua ona ia tē’ena ona e lē o pulegamalo ia o loo apo ma fa’amamalu e Samoa auā na te faatāua pulega faatemokarasi o loo tatou mulimuli ma fa’avae ai Samoa.

O loo tālia e le Palemia sa ia faia ia upu faavi’ivi’i e ala i le faaalo Heil Hitler e pei ona lipotia e le nusipepa ma faalālā i luma lona a’ao taumatau fa’atasi ma nisi sa iai i le fa’atasiga e pei ona fa’ailoa i le ata na faasalalau e le Sunday Samoan.

O le taimi nei e pei ona faailoa lava e le ta’ita’i o le malo i le faamatalaga faalauaitele o loo ave lana faamuamua i galuega fai i lu’itau o le tamao’aiga o le atunu’u. Ua ia fa’ailoa foi e talia e lana faigamalo faitioga ma lagona fa’aalia ma na te fa’aaloalogia foi ma faimea faalogo iai.