Ua faaalia e lana afioga i le Tamaitai Palemia Fiame Naomi Mata’afa i lana feiloaiga ma tusitala i Niu Sila nei, ua tatala alavaa a Samoa i le taimi nei mo na o ona tagata e toe foi atu i le atunuu.
Na ia faamaonia foi le iai o lana feiloa’iga ma le Kamupani Vaalele a le Air New Zealand mo se faamautinoaga o ni malaga i aso ta’itasi mo Samoa pe a toe tatala tuaoi o Samoa i le lalolagi atoa.
Mo le taimi nei e ta’itasi malaga i le vaiaso o loo agai i Samoa, faapea cargo flights ma na ta’ua e Fiame a tatala tuaoi i le masina o Aokuso o le a iai foi le faamoemoe e siitia ai foi ma le aofa’iga o faigamalaga ma le manatu maualuga ia oo atu i le faai’uga o le tausaga ua iai malaga i aso ta’itasi poo daily flights.
E na o le vaalele a le Air New Zealand o loo faimalaga nei i Samoa ina ua lē toe iai se vaalele a le atunuu. E talitonu le Palemia ua lava tapena Samoa e faafeiloa’i i turisi ma tagata tafafao atu pe a toe tatala ona tuaoi.
