E ogaoga ni aafiaga tau tupe e ono feagai ma le faigamalo fou ua tu nei i le foe pe a toe faafoi le vaalele 737-800 o loo tūtū i le malae vaalele i Brisbane i Ausetalia.
E ono tausaga le lisi o le vaalele ua maea ona sainia e Samoa mai le taimi o le faigamalo sa iai i le pulega o le atunuu. Ua faailoa e le Minisita o Faalapotopotoga Tumaoti a le Mālō faapea le
matagaluega o Alamanuia ma Leipa o loo iai foi le vaaiga o le Kamupani Vaalele a le atunuu le Samoa Airways le susuga Leatinuu Wayne Sooialo o lea ua avatu le fautuaga a le Matagaluega o Tupe a le Mālō afai e faafoi le vaalele e feiloai ai ma se faasalaga tau tupe ona o le lisi ua maea ona sainia.
E $180 miliona tala se tino i tupe e totogi e le Samoa Airways pe a tupu lea tulaga. Ua faailoa foi e le Minisita afai foi e aumai le vaalele ma faaaoga o le fautuaga a le Mataglauega o Tupe e ono feagai ai le Kamupani Vaalele a le atunuu ma ni tupe pa’ū poo se gau e 10 miliona tala i le tausaga.
Taua e Leatinuu “E sa’o o le tulaga lena i le fautuaga na aumai e le Treasury poo le Ofisa o Tupe, na fai Laia o scenarios faaaoga e le Komiti o Tupe ina ia Aumai se fautuaga e uiga i le vaalele o lea la e iai le fautuaga lea na aumai a faapea e aumai pea le vaalele i le tulaga lea iai i aiaiga ia e iai ona lē sala ai lea o le tatou Kamupani vaalele poo le tatou Mālō foi i le claim lea e iai e 180 miliona ae e iai le latou fuafuaga a faapea e aumai a le vaalele e tatou faaaogaina i le lā vaitaimi atonu e iai se tupe e gau poo se tulaga faapena pe 10 miliona i letausaga”.
Ua faailoa e le taitai o le Mālō le afioga i le Palemia Fiame Naomi Mataafa i le vaiaso ua tuanai o le vaalele o loo faaauau pea ona faatalanoa i se Komiti galue o loo aofia ai sui o Matagaluega a le malo e fitoitonu ma le Samoa Airways ma ua talosaga atu le Minisita mo nisi vaiaso e faatino ai lea faatalanoaga ma silasila pea i le lumanai o le lisiina o le vaalele 737-800.
