Ua faamalolo lē tumau le Faipule mai nisi o ona tofiga a le National ona e lei sa’o ona faailoa foai na ia tauaaoina i taimi o le palota.
Ua toe ta’utino e le Faipule o New Plymouth ia David MacLeod, na pa’ū ia te ia ona faailoa le silia ma le $160,000 o foai na ia mauaina i le 2022 ma le $10,000 na maua i le tausaga talu ai.
O le Aso Gafua lea e faapea na faato’ā ia logoina ai le Palemia, Christopher Luxon o le ta’ita’i foi o le latou pati, seia oo mai ai ananafi ua sau le tala ua faamalolo lē tumau mai ona tulaga tofi e lua mai komiti filifilia e aofia ai le ta’ita’ifono o le komiti o le siosiomaga.
E ese mai le faasee ese mai nei tofiga ua lē toe maua ai foi ma le silia ma le $15,000 o lona totogi.
Na toe ta’utino foi le Faipule, e na te lei silafiaina a mea e tatau ona faailoa foai na maua i le 2022, sa faapea lava ia e faatoa faailoa i le 2023.
O le uluai paeaiga lenei a MacLeod ua tulai mai ai o le Faipule o New Plymouth ma ua faaalia lona lē fiafia faapea ai ma le popole ina ne’i avea lea ma mafuaaga o le lē toe talitonuina o ia e lona itumalo.
Ae mai le ofisa o faigapalota, e lē o mautinoa i le taimi nei pe ua soli e le Faipule tulafono o faigapalota, ma afai ae o le tulaga lea ua iai, o lona uiga e ono oo i leoleo.
Puna o Faamatalaga: National MP stood down from select committee roles after failing to declare donations | Stuff
