Ua tali le tamaitai Palemia afioga Fiame Naomi Mataafa i faamatalaga ua salalau i luga o le ea i le faamavae ai o le alii Komesina o Faigapalota ia Faimalomatumua Mathew Lemisio.
Ina ua fesiligia e tusitala le tulaga o le faamavaega pe ua oo atu i le Kapeneta le tusi faamavae a Faimalomatumua na tali Fiame “E le’i oo mai i luma o le Kapeneta ae ua maua faamatalaga i luga o faasalalauga”.
Na fesiligia foi le tamaitai Palemia i le tulaga o le vave na faamavae o Faimalomatumua ma see atu i lona tofiga fou ae o lea faatoa uma atu faigapalota laiti a itumalo e 6 i le vaiaso na tea nei.
Taua e le Palemia “O le mea ia i le faafesili, e fua a i le mea ua tupu ma le filifiliga a’i latou ua faia le faaiuga, ia ai a o se faaiuga lea a Faimalomatua ua fai i le talafeagai poo le lē talafeagai aemaise o lenei vaitau. Ia e le’o se mea foi lea e iai so’u malosi e oo atu iai e faavasega ai le mataupu lena ae mo le tagata foi lele, pe a faapea o lea e fesili mai i so’u taofi, ia tuu lelei se isi galuega ona faaauau ai lea o se isi galuega ae atonu ua maua le avanoa i le aso, o se avanoa foi ua logoina mai a’u e le Minisita o Faamasinoga e iai sona popolega o loo iai ma ua ave lona taofi i le pule sili o le Matagaluega faatasi ai ma le Ofisa o le loia sili ona o lea ua maitauina e le Minisita i le tulafono foi lea e faagaioi ai le faamasinoga e le’o iai se aiaiga o iai mo le auala e tofia ai pe vāea ai foi ni faamasino”.
Faailoa foi e Fiame “Manatua la o tulafono ia lea na sui i le tausaga talu ai ma ua iai se finagalo o le Minisita o se lape tele lea tulaga o lona uiga e leai se tapasā e faagaioi ai aemaise o lea sa iai le aiaiga i le tulafono lea na suia i le tulafono o le tausaga talu ai. O lena la mataupu o lea ua laga mai e le Minisita auā e faateia foi o ia na te le’i iloa foi o iai se tulaga o loo sailia le tofi o le Sui Peresetene auā e le’i faasalalauina pei o tulaga masani faapena”.
E pei ona silafia o le faamavaega a Faimalomatumua na faasalalau i luga o upega tafailagi i le Aso Lulu ma na ripotia o le a agai e tauave le tofiga fou o le Sui Peresetene o le faamasinoga o Fanua ma Suafa.
