Search
Search
Photo Credit: RNZ

E leai se matafaioi a Saina i galuega faapuipuiga a leoleo i le Pasifika

Ua faaalia e le alii Minisita o le Pasifika a Ausetalia, Pat Conroy, e lē tatau ona iai se matafaioi mo Saina e leoleo ai fua motu o le Pasifika, ma mo Ausetalia o le a tele atu ona latou aoaoina vaega o puipuiga faalotoifale e faatumu ai avanoa.

O lea tali a le alii Minisita ina ua mae’a ona lipotia e le vaega o tala a le Reuters ia leoleo a Saina o loo galulue i le motu o Kiribati.

O le Aso Gafua sa lapataia ai ma se faaeteetega e Amerika ia motu i le Pasifika faasaga i fesoasoani mai i vaega o puipuiga a Saina, ina ua mae’a ona faaalia e le sui Komesina o Leoleo a Kiribati, Eeri Aritiera, i le Reuters i le vaiaso talu ai e faapea, o leoleo ofu togiga a Saina sa galulue ma a latou leoleo i le vaavaaia o tagata lautele ma polokalame o faamaumauga o soligatulafono.

E leai ni leoleo a Ausetalia i Kiribati, ae ua ta’utino e Canberra ia le faatupeina o galuega fou soofaatasi a leoleo i fesootaiga i leitio – police radio network – faapea ma nofoaga mo leoleo, ma faufautua e toalua mo le puipuiga o le gataifale, aemaise ai le lagolagoina o leoleo a Kiribati mo le vaavaaia lelei o le vaa petolo sa latou foaia.

O Kiribati e 115,000 lona faitau aofai, o le motu tulalata iai e 2,160 kilomita le mamao i Saute o Honolulu.

Ma se tala i leoleo Saina o loo galulue ai ua alia’e ane a o toe faafouina e Saina lana tuleiga e faalautele ana sootaga o puipuiga i motu o le Pasifika, i le faateteleina o faatautavaga ma Amerika.

Faaalia e Conroy, o loo latou iloaina le tilotilo o Saina e faalautele atu ana matafaioi o puipuiga i le Pasifika, ma o loo tamamau pea i le latou manatu, e leai se matafaioi mo Saina i le leoleoina, poo le puipuiga o tuaoi i le Pasifika.

Ma ia ta’ua ai, sa malilie taitai o le Pasifika i le 2022 i le fonotaga faaitulagi a le Fono a le Pasifika e faatumuina ni avanoa o galuega faaleoleo mai lava i totonu o le aiga o le Pasifika.

O leoleo a Saina ua mae’a ona galulue i le motu o le Atu Solomona talu mai le 2022.

Faaalia e Conroy, e manao Ausetalia e tilotilo, o leoleo mai Papua New Guinea, Fiti ma isi motu i le Pasifika o faia so latou sao tele e fesoasoani ai i puipuiga o motu tuaoi, e pei ona faia mo taaloga a le Pasifika ia Tesema i le Atu Solomona.

Tala sili ona faitaulia

FAATALATALANOAGA

Tala mai samoa

TALA FOU MAI SAMOA

SAMOA UPDATE

PODCAST

Listen on

POLOKALAME A LEOLEO

Keep uptodate with Radio Samoa activity & promotion

* indicates required