Ua faamautinoa mai e le matagaluega o le va i fafo, e iai lona talitonuga e lē o toe iai se isi tagata sitiseni pe nofomau Niu Sila o totoe i Gaza.
O le faamaoniga lea na sau ananafi i le mae’a faailoa e le minisita o le va i fafo i luga o le social media i le po o le Aso Toonai, Winston Peters e toatasi le tagata sitiseni Niu Sila o loo fesoasoani iai le amepasa o Niu Sila o loo i le taulaga o Aikupito, ma o lea na ia tuua Gaza.
O lea tagata sitiseni e faapea o loo iai faatasi ma se tasi o lona aiga.
Na fai mai ai ma le matagaluega i le mae’a faailoa e le minisita, e lē o iai sona talitonuga o toe iai se tagata Niu Sila o taumafai e tuua Gaza.
O le masina talu ai na fai mai ai e 20 tagata Niu Sila o loo taumafai e agai ese ma Gaza.
