“O la’u a vaai e lē o se suesue masei, ae o le taumafai o le Malo e apo ma mulimulitaia taiala o pulega lelei”.
O le finagalo lea o le Minisita o Tupe le afioga Lautimuia Afoa Uelese Vaai e faamatala ai le sailiiliga ua faagasolo nei i le fesili, pe sa lelei ma sagatonu aemaise pe sa mulimulitaia taiala o pulega lelei ma tausisia foi aiaiga o le tulafono o le faaaogāina o tupe a le Malo i galuega o atinae eseese sa faatino i tausaga ua mavae, a o tulai le faigamalo a le HRPP.
O le finagalo o le minisita o tupe i le polokalame o le Soalepule sa ia faailoa ai, o le autu lea o le forensic audit poo le sailiiliga o loo feagai ma se kamupani mai fafo ua ave iai lea galuega.
“O le silasila a le tamaitai Palemia ma le faigamalo ia tausisia ala faaletulafono ma ia sosolo le faatinoga o galuega a le Malo e tusa o faiga faavae ma taiala faaletulafono, o le mafuaaga tāua lava lena o nei sailiiliga”.
Faaalia foi e Lautimuia o le tāua o se taunuuga o ia sailiiliga o le a maua ai nisi fuafuaga lelei mo le faatinoga o galuega a le Malo i le lumanai ina ia taunuu ise tulaga manuia, fuafuaga o le atinae o le atunuu.
O sailiiliga o loo faia e ala i le sueina o tusi i le faaaogaina o tupe, ma silasila pe sa sosolo le faatinoga o galuega i faiga faavae na tulafono a le Malo, o loo iai le fuafuaga e tatau ona maua, a o lei faataoto e le faigamalo le isi ana tala autu o fuafuaga o le tupe mo le isi tausaga faaletupe fou.
