O se vaega lena o le saunoaga mautinoa a le Tofi o le Itumalo o Faleata 1, le afioga Manuleleua Talitau Paletasala Tovale, ina ua faaiuiu lana lauga i totonu o le fonotaga a le Palemene i le aso ananafi, lea sa lauga ai e agai i le tulafono o faigapalota e pei ona faatalanoa ai nei ni suiga poo teuteuga o loo fuafua le faigamalo e toe faia iai.
Na pa’i puupuu le saunoaga a le alii Faipule i le mataupu lea e pei ona agiga i luga o tusitusiga i auala o fesootaiga televavave, le facebook, i le faasalalau ai e se tasi o kamupani faatau fale ma fanua, le Samoa Realty, o le fia faatau ese atu o le fale lea o loo pipii ai le faailoilo a le Fono Faavae a le itumalo faapalota o Faleata 1.
Na faamanino ai loa e le Faipule, o le fale e lē o se fale e onaina pe own e le itumalo, ae own e Felela, ma ia saunoa ai, e pule la Felela i le latou fale pe fia faatau ese atu pe leai, lona uiga o loo lisi ai le Fono Faavae mo le latou faaaogāina.
Peitai na faamautinoa mai e le Faipule i lona itumalo, ia aua le popole o loo sologa lelei lava mea uma, ma o loo iai pea le latou Fono Faavae i le fale lea i Sinamoga o loo avea ma o latou ofisa autu.
I le taimi nei, ina ua toe saili atu le upega tafailagi a le kamupani faatau fale/fanua, le Samoa Realty lea na faasalalau mai ai lenei fale, ae foliga mai ua aveese i lalo le faasilasilaga lea sa iai.
