A o loma le tau malulu o lenei tausaga, ua lipotia e tusa ma faamaumauga o loo tuuina atu i le minisita, e lē o mautinoa le lava o le sapalai eletise.
O lea o loo fai ma faailo agai i le minisita o le malosiaga tau eletise, Simeon Brown le tulaga o iai tapenaga o le sapalai e lē gata mo le tau malulu o loo agai mai, a o faatusatusaga i mea na tutupu i le lua tausaga ua tuanai.
O lipoti nei o loo ta’ua ai e ono faatupulaia le manao i lenei tau malulu ma ua ta’utino ai le minisita i lipoti a le 1News, o le tau malulu o le tausaga lenei ma le tausaga fou, e tele ni lu’itau o le a ui ai aemaise o itu e ono lamatia ai.
I le taimi nei o lea o loo faaaogā uma afi faaleoleo e faafetaiai ai le manao o le maketi ma o lona uiga e leai se faaleoleo e mafai ona tua iai i taimi e maualuga ai le faaaogā poo taimi foi e motusia faafuasei ai.
A o fai mai ai le minisita o loo agai le malo i suiga o tulafono e fesoasoani ai e faataunuu suiga e mafai ai ona tali ai le faafitauli, ua fai mai le pule sili o le Octopus Energy, Margaret Cooney, e lē na o Niu Sila o loo aafia le sapalai o le eletise, peitai o le faafitauli o Niu Sila o le leai o se inivesi i faiga fou e mafai ai ona faafetaiai e le sapalai, o le manao lea o loo alualu pea i luga.
Puna o Faamatalaga: NZ’s electricity ‘a very tight supply situation’ in cold months (1news.co.nz)
